Eksperti i ekonomisë, Panajot Soko, ka denoncuar një skandal të lidhur me ndërtimin e rrugës së Arbrit dhe kompanisë që po e ndërton atë “Gjoka Konstruksion”. Ai ka publikuar një mesazh të ardhur në adresë të tij nga një punonjës i kësaj kompanie, ku ky i fundit shkruan se kompania i ka mbajtur 10% të rrogës së parë, dhe refuzon t’ia japin pasi ka dhënë dorëheqjen dhe pret të largohet për në Angli.
Ndërkohë ai shton se kjo kompani “ka lidhje me politikën dhe që i falin një herë në tre muaj 20 milionë dhe 40 milionë, duke abuzuar me ndërtimin e rrugës së Arbrit”.
Ndërkohë ndonëse segmente të Rrugës së Arbrit janë hapur për përdorim nga qytetarët ato nuk përmbushin kriteret e nevojshme të sinjalistikës. Jo më larg se dje në një nga segmente ndodhi një aksident fatal me 3 të vdekur. Gjithashtu kjo rrugë bllokohet sa herë që ka reshje shiu apo dëbore, si dhe asfalti i shtruar është dëmtuar shumë brenda një kohe të shkurtër.
“Në rrugën e Arbrit, në dy tunelet e para me gjatësi 540 metra, është shembur jo për shkaqe natyrore apo gjeologjike, por për të kursyer beton, i është futur polisterol. Betoni çonte polisterol, sipër e puthiste për shkëmb, dhe tuneli u shemb. Bypass e ka bërë si bypass lufte… tunelet kanë dhe shtresa një plastike dhe një si batanije e bardhë. Në tunele kjo është venë vetëm në 12 metrat e para. Këtë e gjen prokuroria sa metra katrorë ka marrë e zhdoganuar, sa janë llogaritur për tunele dhe sa ka gjendje në magazinë”, shkruan qytetari.
“Një thirrje për organet ligjzbatuese. Akuzat janë konkrete dhe minimalisht duhen verifikuar qoftë nga KLSH apo Prokuroria. Një gjë eshtë fakt, kostoja financiare e deritanishme e këtij konçesioni është e jashtëzakonshme. Shteti duhet të përgjigjet!”, shprehet Soko.
