Policia ka arrestuar një 24-vjeçar nga Korça në kuadër të finalizimit të operacionit të koduar “Restart”.
Bëhet me dije se i riu është kapur duke tentuar të trafikojë lëndë narkotike në formë çokollate drejt Greqisë. Në shtëpinë e 24-vjeçarit janë gjetur dy çanta sportive me 30 kg lëndë të dyshuar narkotike kanabis. Theksojmë se E. Z., 24 vjeç akuzohet për veprën penale “Trafikimi i narkotikëve” mbetur në tentative, ndërsa mësohet se është proceduar penalisht bashkëpunëtori I tij, A.Z, 32 vjeç banues në fshatin Ponçarë, Devoll, për veprën penale “Trafikimi i mjeteve motorike”.
Njoftimi i policisë:
Korçë
Finalizohet faza e dhjetë e operacionit policor të koduar “Restart”, startuar tetë muaj më parë.
Operacioni i zhvilluar nga Seksioni për Hetimin e Trafiqeve të Paligjshme dhe Narkotikëve në DVP Korçë, në bashkëpunim me AMP Korçë, Policinë Kufitare, shërbimet e Frontex-it, Komisariatet e Policisë Korçë dhe Devoll, nën drejtimin e Prokurorisë, për goditjen e veprimtarisë kriminale në fushën e shpërndarjes dhe trafikimit të lëndëve narkotike në drejtim të shtetit grek.
Vihet në pranga 1 shtetas dhe procedohet penalisht në gjendje të lirë 1 tjetër.
Sekuestrohen 30 kg të tjera lëndë e dyshuar narkotike kanabis.
Shkon në 23 numri i të ndaluarve, në 565.5 kilogramë lëndë narkotike kanabis dhe 550 gramë kanabis në formë çokollate, sekuestruar në kuadër të këtij operacioni.
Specialistët e Seksionit për Hetimin e Trafiqeve të Paligjshme dhe Narkotikëve në Drejtorinë Vendore të Policisë Korçë, në bashkëpunim me Agjencinë e Mbikëqyrjes Policore (AMP) Korçë, Policinë Kufitare, shërbimet e Frontex-it, Komisariatet e Policisë Korçë dhe Devoll, nën drejtimin e Prokurorisë së Rrethit Gjyqësor Korçë, në vijim të operacionit policor “Restart”, nisur tetë muaj më parë kanë finalizuar me sukses fazën e dhjetë të tij, si rezultat i së cilës u bë ndalimi me iniciativë i shtetasit:
– E. Z., 24 vjeç, për veprën penale “Trafikimi i narkotikëve” mbetur në tentativë;
Si edhe u referuan materialet në Prokurori dhe filloi procedimi penal në gjendje të lirë për shtetasin:
– A. Z., 32 vjeç, banues në fshatin Ponçarë, Devoll, për veprën penale “Trafikimi i mjeteve motorike”.
Nga tërësia e veprimeve hetimore dhe informacioneve të grumbulluara se shtetasi E. Z., në bashkëpunim me persona të tjerë, ushtronte aktivitetin e kundërligjshëm të trafikimit të lëndëve narkotike në drejtim të Greqisë, nëpërmjet kufirit të gjelbër, shërbimet e Policisë organizuan punën dhe nga kontrolli i ushtruar në afërsi të banesës së tij në fshatin Ponçarë, gjetën dhe sekuestruan 2 çanta sportive, me 30 kg lëndë të dyshuar narkotike kanabis. Gjithashtu gjatë kontrollit të ushtruar në lokalin e shokut të tij, shtetasit A. Z., u gjet e sekuestrua një motor i markës “Peda Tek”, pa targa dhe dokumentacionin përkatës, i cili rezultoi i vjedhur në Maqedoninë e Veriut.
Në bashkëpunim me Prokurorinë, po vijon puna për dokumentimin e plotë të ngjarjes.
Materialet i kaluan Prokurorisë së Rrethit Gjyqësor Korçë, për veprime të mëtejshme.
