Një ditë më parë, mediat italiane raportuan gjerësisht për vizitën e kryeministres Giorgia Meloni në Shqipëri, e cila do të zhvillohet më 5 qershor. Sipas agjencisë shtetërore italiane të lajmeve, ANSA, në fokus të kësaj vizite është puna për ngritjen e kampeve të refugjatëve në Shëngjin dhe Gjadër të Lezhës.
“Puna atje është ende në vazhdim, por falë javës së kulturës italiane, Giorgia Meloni do të kthehet në Shqipëri të mërkurën e ardhshme për të vizituar dy qendrat e menaxhimit të emigrantëve, të cilat nuk janë ende funksionale, por që qeveria dëshiron t’i aktivizojë ‘sapo të jetë e mundur’,” – shkruan ANSA.
Sipas ANSA, Meloni mund të mos shkelë as në Tiranë gjatë kësaj vizite të shkurtër, edhe pse agjenda e takimeve ende nuk është finalizuar. “Vizita në Shqipëri do zhvillohet pak ditë para zgjedhjeve europiane të 8 dhe 9 qershorit,” – nënvizon ANSA.
“Vizita në Shqipëri do të jetë institucionale për kryeministren, edhe pse do të përkojë me fushatën elektorale dhe vjen pas ‘inspektimit’ të ditëve të fundit të deputetëve të së majtës që drejtuan gishtin tek ‘blofi elektoral’ dhe spektakli me ‘buldozerë në shkretëtirë’ që hasën në kantieret e ndërtimit,” – shkruan ANSA.
Vizita e Melonit ishte planifikuar fillimisht për 20 maj, por u shty disa herë dhe tani është planifikuar për të mërkurën, vetëm tre ditë para zgjedhjeve evropiane.
