Kreu i Lidhjes Demokratike të Kosovës, Lumir Abdixhiku ka reaguar për tensionet me Serbinë në veri të vendit, me anë të një postimi në rrjetet sociale. Abdixhiku bën me dije se ka qenë në kontak me kryeministrin Kurti dhe kryeparlamentarin Glauk Konjufca dhe ka shprehur shqetësimin për sigurinë e forcave speciale të Kosovës që ndodhen në veri. Kreu i LDK thotë se gjendja në kufi kërkon unitet të plotë dhe propozon që Kurti të mbledhë spektrin politik në vend për të mbrojtur interesat shtetërore të Kosovës.
Reagimi i plotë:
Të dashur qytetarë,
Përgjatë pesë ditëve të fundit, LDK ka përcjellur me vëmendje e shqetësim zhvillimet në Veri të vendit. Përgjatë kësaj kohe, unë dhe kolegët e mi kemi qenë në kontakt me Kryeministrin Kurti, Kryeparlamentarin Konjufca e me zyrtarë të tjerë qeveritarë.
Në këto komunikime, përveç se kemi shprehur shqetësimin për gjendjen e sigurisë, të djemve tanë në uniformë atje, kemi kërkuar dhe qartësime në lidhje me planet e Qeverisë mbi menaxhimin e situatës. Mbi të gjitha, si LDK kemi shprehur gadishmërinë e plotë, për të ndihmuar në të gjitha kapacitetet që kemi, Qeverinë e vendit.
Gjendja e tensionuar në Veri kërkon unitet të plotë, prandaj propozoj që Kryeministri të mbledhë spektrin politik në vend, të ftojë partitë parlamentare në takim – pozitë e opozitë pa dallim, në mënyrë që të shfrytëzojmë të gjitha kapcitetet tona, vendore e të jashtme, për të mbrojtur interesat tona shtetërore sot.
Po ashtu, i bëj thirrje, komunitetit ndërkombëtar, aleatëve tanë, që të bëjnë gjithë ç’është e mundur, për të shmangur kërcënimet e Serbisë dhe tensionet në veri të vendit.
