Skandalet në spitalet COVID në vendin tonë nuk kanë fund. Pas rasteve të korrupsionit në bluzat e bardha dhe denoncimit të vdekjeve si pasojë e mungesës së shërbimit, tashmë vjen edhe një tjetër denoncim. Një pacient që po trajtohet në një nga spitalet COVID thotë se gjithë ditën i japin për të ngrënë vetëm një panine e një gotë qumësht. Denoncimi është bërë nga mbesa e tij në emisionin Stop, ndërsa nga biseda lihet të kuptohet se nuk ka as doktorë.
Pjese e bisedes:
Pacienti: Më japin pak qumësht edhe..
Familjarja: Kaq tërë ditën vetëm një panine dhe një gotë qumësht?
Pacienti: Për ca ila e moj, nuk ka doktora, nuk ka doktora, nuk vijnë, nuk ka. Vetëm vijnë këtu nga këto çupa, çuna, të pyet dhe njëherë qysh je dhe ikën nuk duken më. Mua më bie ndonjë pikë ujë të njom buzët, nuk ka. I thashë më çoni tek ai spitali në Sanatorium është më mirë aty, “ik” më tha mua, iki i thashë po me ça, qysh do iki, do më çosh ti atje me ambulancë?
Familjarja: O daja, i thuaj mua po më mbani për të vdekur këtu? Më bëni ilaçe, më bëni kura, ose më hiqni më çoni në shtëpi i thuaj, nuk dua unë të rri më këtu!
Pacienti: I thashë moj, i thashë edhe atë.
Familjarja: Mirë o daja, mos u mërzit, mos u lodh, se do të marr prapë pastaj!
Pacienti: Hajde natën!
Ky është rasti i radhës që vërteton se sistemi spitalor është në një krizë të vërtetë si pasojë e COVID, situata është aq e rëndë sa pacientëve nuk i japin as ushqim. Ministria e Shëndetësisë mori vendimin pak kohë më parë për të ndaluar familjarët që të çonin ushqime në spitalet COVID, me shumë mundësi për të ruajtur një imazh të mirë. Por me sa duket, tashmë që nuk marrin ushqime as nga familjarët e tyre, pacientët me koronavirus janë lënë në mëshirë të fatit, pa ushqim e pa kujdes.
