Teksa po lëmë pas një javë me temperature ekstremisht të ulëta dhe të pazakonta për vendin tonë, ditët në vijim mesa duket do të jenë më të ngrohta. Për javën që presim përpara, vendi ynë do të ndikohet nga kushte të qëndrueshme atmosferike, kjo falë depërtimit të Anticiklonit të Azoreve deri në europën qëndrore.
Theksojmë se ky depërtim i rrallë për periudhën që ndodhemi do të sjellë jo vetëm mot të qëndrueshëm, por gjithashtu rritje graduale të temperaturave kryesisht në vlerat e mesditës.
Shërbimi Meteorologjik Ushtarak raporton se kjo ndodh për shkak të masave ajrore më të ngrohta. Në këtë mënyrë, moti për të gjithë javën parashikohet i kthjellët në të gjithë territorin, përjashtuar vranësirat e pakta deri mesatare kalimtare në relievet malore në lindje.
Era do të fryjë kryesisht me drejtim nga kuadrati i veriut mesatare me shpejtësi 1-7m/s, ndërsa përgjatë vijës bregdetare dhe lugina hera-herës e fortë dhe shpejtësi deri në 10-14m/s./
Kujtojmë që Shqipëria u përfshi nga një ulje e ndjeshme e temperaturave ndërsa zonat malore janë mbuluar nga dëbora dhe ngrica. Anila Gjoni nga Instituti i Gjeoshkencave deklaroi se jemi në muajin më të ftohtë dhe java që po lëmë pas ishte më e ftohta e vitit.
