Gjykata e Posaçme ka vendosur të kalojë për gjykim dosjen “Sterilizimi”, ku të pandehurit Ilir Beqaj, Klodian Rrjepaj dhe Ilir Rrapaj përballen me akuzat për “vjedhje duke shpërdoruar detyrën” dhe “pjesëmarrje në grup të strukturuar kriminal”.
Gjykata deklaroi se trupi gjykues i plotë do të vendosë për formën e gjykimit.
Në seancën e sotme, ish-ministri Ilir Beqaj u përball me trupin gjykues dhe prokurorët, duke i akuzuar ata për procesin e sterilizimit.
Beqaj e cilësoi procesin si politik dhe akuzën ndaj tij si një farsë të sajuar, pasi dy pretendimet e Prokurorisë për shpërdorim detyre dhe korrupsion u rrëzuan.
Beqaj kërkoi përjashtimin e gjyqtares Flojera Davidhi, e cila ka qenë gjithashtu gjyqtare që i hoqi masën e arrestit Sali Berishës, por GJKKO e rrëzoi kërkesën e ish-ministrit të Shëndetësisë.
Ish-ministri i Shëndetësisë, akuzohej fillimisht për shpërdorim detyre, një akuzë që parashikonte deri në 7 vite burg, por tashmë ai përballet me një rrezik më të madh.
Ai akuzohet për vjedhje duke shpërdoruar detyrën, sipas nenit 135 të Kodit Penal, që parashikon dënim deri në 10 vite burg, dhe për veprën e grupit të strukturuar kriminal, që mund të sjellë dënim prej 2 deri në 5 vite burg, sipas nenit 333/a.
Neni 334 i Kodit Penal parashikon që çdo dënim për vjedhje duke shpërdoruar detyrën të shtohet me 5 vite burg, kur bëhet fjalë për veprën e grupit kriminal.
SPAK ka akuzuar ish-ministrin Ilir Beqaj për shpërdorim detyre në lidhje me koncesionin e sterilizimit të pajisjeve kirurgjikale, një kontratë 10-vjeçare me vlerë rreth 100 milionë dollarë, e firmosur në dhjetor të vitit 2015 dhe që ende është në fuqi.
Ish-ministri i Shëndetësisë u arrestua për abuzimet e kryera gjatë kohës që drejtonte SASPAC.
