Tritan Kalo është tashmë një figurë e njohur për publikun shqiptar, pasi shpesh është i pranishëm në media ku jep këshilla për qytetarët, teksa ka spikatur edhe për deklaratat ngacmuese që bën.
Së fundmi, infeksionisti ka treguar rreth njohjes së tij me kryeministrin Rama, në vitin 1996, kur ai e ka mjekuar.
Asokohe kryeministri ishte dhunuar barbarisht dhe kishte pësuar dëmtime të shumta në fytyrë e pas kësaj e kishin dërguar në Urgjencë, ku askush nuk shkonte ta ndihmonte, pasi SHIK-u nuk i lejonte, tregoi mjeku.
Në një intervistë për “A Krasta Show”, ai tha se me Ramën ka një njohje të vjetër, pasi kanë jetuar në një pallat.
“Ka lindur në pallatin ku jetoj, e njoh sepse jemi miq të rinisë, dhe e njoh në disa rrethana jo të mira për shëndetin e tij, në kohën kur është goditur në vitin 1996, kur pësoi disa çarje dhe ishte në rrezik për jetën. Unë e kam ndihmuar dhe e kam mjekuar personalisht. Në atë kohë është çarë është dëmtuar dhe është sjellë në shërbimin e urgjencës në QSUT, e lanë pa asnjë ndihmë. Isha mjek roje dhe më thanë që kishin sjellë Edin dhe ishte shumë i dëmtuar. Ishin nga dy të SHIK-ut aty që nuk linin mjekët që ta ndihmonin dhe ta mjekonin. Unë kam ardhur nga Franca dhe kam mjekuar një nga kriminelët më të mëdhenj të Luftës së Dytë Botërore që ishte me SIDA. Unë mjekova dhe Ramën dhe më pas i shkoja çdo ditë në shtëpi, pasi e kisha djalë pallati”, u shpreh Kalo.
Sakaq, mjeku ka folur edhe rreth daljeve të shpeshta të kreut të qeverisë dhe deklaratave për të cilat është akuzuar se po bën rolin e mjekut.
Mjeku u shpreh se nuk i ka qejf ata që flasin për të gjitha dhe për këta njerëz ai përdor termin gjitholog, ku sipas tij futet dhe Rama.
“Në vetë të parë s’ia kam bërë kritikën, por kam përdorur në shkrimet e mira një term: gjitholog”, u shpreh ai.
