Mëngjesin e sotëm një breshëri plumbash kanë ekzekutuar 55-vjeçarin Nazmi Bandula në Shkodër teksa ai po pinte kafen në një lokal afër banesës.
Siç shihet edhe nga pamjet e sigurara nga ‘Fax News’, vrasja ka ndodhur në ambientet e jashtme të një lokali, ndërkohë që burimet saktësojnë se ndaj Bandulës është qëlluar nga një makinë në lëvizje.
Lokali në fjalë ndodhet në afërsi të banesës së viktimës, dhe kafja frekuentohej prej tij pothuajse në mënyrë të përditshme.
Gjithashtu lidhur me vrasjen ka reaguar zyrtarisht edhe policia e Shkodrës, e cila thotë se ka ngritur disa pika kontrolli në Shkodrës, duke bllokuar të dy krahet e unazës perëndimore të qytetit, me qëllim kapjen e autorëve.
Njoftimi i Policisë së Shkodrës:
Rreth orës 08:15, në lagjen “Partizani”, Shkodër, në rrethana ende të paqarta është vrarë me armë zjarri shtetasi N. B., 55 vjeç, banues në lagjen “Partizani”.
Shërbimet e Policisë kanë rrethuar zonën dhe vijon krehja e saj, me qëllim kapjen e autorit.
Grupi hetimor ndodhet në vendngjarje dhe nën drejtimin e Prokurorisë vijon punën për sqarimin e plotë të rrethanave të ngjarjes. Në vendin ku është vrarë 55-vjeçari janë te vendosura dhjetra biznese, me kamera sigurie, që mund të ndihmojnë në zbardhjen e kësaj ngjarje të rëndë.
Kujtojmë që viktima nuk rezulton një emër i panjohur për policinë, pasi më 27 dhjetor të 2020, i kanë shpërthyer me tritol mjetin tip “Fuoristradë”.
Bandula deklaronte asokohe se nuk kishte konflikt me asnjë dhe nuk e dinte idenë se kush fshihej pas vendosjes së tritolit.
