Situata në aeroportin e Kabulit nuk paraqitet aspak e mirë. Forcat e SHBA-ve, të cilat po ndihmojnë në evakuimin e afganëve të dëshpëruar që duan të largohen sa më parë nga vendi i tyre, për t’i shpëtuar regjimit të talebanëve, janë në gatishmëri.
Së fundmi ushtria amerikane ka deklaruar se gjatë një sulmi me dron ka arritur të vrasë një anëtarë të ISIS, i cili po planifikonte sulme terroriste. “Sulmi ajror pa pilot ndodhi në provincën Nangarhar të Afganistanit. Indikacionet fillestare janë se ne e kemi vrarë objektivin, “tha kapiteni Bill Urban i Komandës Qendrore të SHBA në një deklaratë. “Ne nuk dimë për viktima civile.” Sulmi i së enjtes u mor përsipër nga një degë e ISIL-it në Afganistan-Shteti Islamik në Provincën Khorasan, ISKP (ISIS-K). Po ashtu Shtetet e Bashkuara besojnë se ka ende kërcënime “specifike, të besueshme” kundër aeroportit pas bombardimeve vdekjeprurëse.Kujtojmë se disa sulme të njëpasnjëshme ndodhën disa ditë më parë në aeroportin e Kabulit, ku u vranë të paktën 175 njerëz, sipas burimeve të Al Jazeera. Trembëdhjetë pjesëtarë të shërbimit amerikan dhe 162 afganë vdiqën në sulmin jashtë aeroportit të Kabulit. Ndërkohë që ISIS mori përgjegjësi të plotë për ngjarjen dhe paralajmëroi se sulme të tjera do të vinin.
