Kreu i SPAK Altin Dumani iu është përgjigjur pyetjeve të deputetëve gjatë prezantimit në Kuvend të punës së Prokurorisë së Posaçme. Një prej deputetëve ishte edhe Denis Deliu, i cili ndryshe nga kolegët e tij solli në vëmëndje një temë për të cilën nuk flitet shumë, jo për nga rëndësia, por ndoshta nga interesat. Sipas Deliut në portalet e vendit qarkullojnë lajme dezinformuese lidhur me turizmin në Shqipëri, duke hedhur dyshime se mund të kenë ndikim edhe shërbimet inteligjente të huaja. Vlen të theksohet se këto komente vijnë në një kohë kur në mediat në vend kanë qarkulluar një seri artikujsh për zbrazjen e plazheve të Shqipërisë, duke ia faturuar më shumë fajin çmimeve të larta.
“Turizmi është shumë i rëndësishëm për Shqipërinë, dhe ditët e fundit kemi parë nëpër portale një sabotim të turizmit. Sivjet ka një rritje të nivelit të dezinformimit.
A ka hapur SPAK një hetim për sabotazh kundrejt këti fenomeni nga shërbime të huaja inteligjente, a ka informacione nga SHISH dhe struktura të tjera, pasi mendoj që këto lloj dezinformimesh dëmtojnë ekonominë shqiptare”, tha deputeti Deliu.
Kreu i SPAK, Dumani tha se nuk ka informacion mbi këtë çështje.
“Nuk kemi informacion, apo diçka për të ndarë sa i përket kësaj pyetjeje”, u shpreh Dumani.
Vlen të theksohet se pavarësisht se nuk ka pasur bujë mediatike, kanë qenë disa, rastet e ndotjes së ujërave shqiptare si pasojë e derdhjes së naftës nga pala greke. Rasti më i fundit ishte në muajin qershor dhe fillimit të korrikut 2024, ku ka pasur disa incidente të derdhjes së naftës në detin Jon pranë bregut të Greqisë. Këto derdhje kanë ndotur plazhet në jug të Shqipërisë, duke përfshirë Vlorën, Sarandën dhe Dhërmiun.
