Si në shumë vende edhe Shqipëria rrezikon të ketë një rritje të rasteve nga nënvarianti i Omicron, BA.2.
“Ky nënvariant po qarkullon në shumë vende të Europës dhe rajonit. Momentalisht në Shqipëri nuk është vërtetuar por nuk përjashtohet mundësia e qarkullimit. Është çështje kohe, javësh që të hyjë në Shqipëri përderisa qarkullon në Europë e rajon. Parashikohet një rritje e lehtë e numrit të rasteve sidomos te personat e pavaksinuar prandaj theksohet rëndësia e vaksinimit. Vaksina ofron mbrojtje edhe nga nënvarianti BA.2. Është i rëndësishëm vaksinimi i popullatës me dozën e tretë, të gjithë personat 60 vjeç e lart që kanë sëmundje kronike duhet të vaksinohen”.
Sipas epidemiologut Artan Simaku, studimet e deritanishme tregojnë se varianti i ri BA.2, ka transmetueshmëri më të madhe se sa Omicron.
“Nga ana klinike shenjat dhe simptomat janë të njëjta vetëm është vërejtur nga eksperienca në shtetet ku po qarkullon ky variant, ka një kohëzgjatje më të të gjatë se sa varianti bazë Omicron. Klinicistët kanë vënë re që mund të japë diskomfort të barkut ose një diarre të lehtë”.
Të dhënat e Ministrisë së Shëndetësisë në Shqipëri tregojnë së prej gati një jave rastet aktive kanë pësuar një rritje të lehtë, nga 440 raste në rreth 520.
