Kryetari i Këshillit Drejtues të RTSH-së, Leka Bungo, ka pranuar shkeljet në procesin e zgjedhjes së drejtorit të ri të RTSH-së gjatë një deklarate në Komisionin e Medias.
Ai ka theksuar se ka pasur paligjshmëri në këtë proces, duke kritikuar drejtoreshën e përkohshme, Aurora Polon, për kandidimin e saj, pasi nuk plotësonte kriteret e nevojshme për këtë pozicion.
Bungo ka akuzuar që këto shkelje janë të njohura për anëtarët e Këshillit Drejtues, dhe ka përmendur se ky proces ka pasur ndikim të jashtëligjshëm, i iniciuar nga Peza.
“Unë mendoj se paligjshmëria në procesin zgjedhor të zgjedhjes se drejtorit të ri është koshiente. Nga të gjitha dokumentet të gjithë anëtarët e Këshillit Drejtues e dine, e njohin mirë, se zgjedhja e një kandidature si Aurora Polo që është kandidate në garë nuk plotësojnë kriterin kryesor për drejtor. Kjo paligjshmëri ka filluar kohë më parë e propozuar nga Peza për arsye të kundërshtimit të të njëjtit ligj nuk duhet të zgjidhej”, tha Bungo.
Ndërkohë, një javë më parë, Këshilli Drejtues i RTSH-së ka skualifikuar tetë kandidatë të tjerë nga gara për Drejtor të Përgjithshëm, duke shkaktuar polemika, pasi nuk ka pasur një diskutim të hapur mbi kriteret e plotësuara nga kandidatët.
Kjo ka ngjallur shqetësime për procesin, duke lejuar që një kandidat me njohuri të kufizuara të votohet pa verifikimin e plotë të CV-së së tij.
Në mbledhjen e Këshillit Drejtues, ka pasur gjithashtu shkelje të procedurave, duke përfshirë mundësinë që anëtari i Këshillit Drejtues, Mevlan Shanaj, të votojë online nga Vietnami, duke cenuar fshehtësinë e votës.
Konflikti është përshkallëzuar për shkak të akuzave për emërime dhe largime arbitrare nga puna, si dhe për shpërdorim të fondeve publike për organizimin e festivaleve dhe projekteve.
Skandalet e tjera përfshijnë largimin nga puna të dhjetëra gazetarëve dhe punonjësve të RTSH-së, si dhe presionet për dorëheqje.
Largimet janë bërë pa respektuar dispozitat e Kodit të Punës dhe kontratat e punës, duke krijuar një klimë pasigurie për punonjësit.
Konflikti është përshkallëzuar nga Bungo, i cili ka pasur përplasje me ish-drejtues të tjerë të RTSH-së, ndërsa skandali më i madh lidhet me një kontratë mes tij dhe Pezës, që ka përfshirë përfitime financiare të dyshueshme për skenarin e Festivalit të Fundvitit.
Ky skandal ka ngritur shqetësime të mëdha për funksionimin e RTSH-së dhe për përgjegjësinë e institucioneve për hetimin dhe ndëshkimin e abuzimeve me fondet publike.
