Më 2 qershor kreu i Grupit Parlamentar të Partisë Socialiste, Taulant Balla, i ka dërguar një kërkesë Gjykatës së Tiranës, për të përjashtuar nga çështja e privatizmit të CEZ, gjyqtaren Fatmira Hajdari.
Kjo e fundit sipas Ballës është në konflikt interesi, pasi ka miqësi me familjen e Sali Berishës, të cilët janë të akuzuar prej tij, duke shtuar se ajo ndodhet në kushtet e parashikuara nga neni 17 pika 1 shkronja “ë” të Kodit të Procedurës Penale.
Numri 2 i PS vijon më tej duke thënë se në kushtet kur kallëzimi i Kuvendit implikon shtetasit Shkëlzen Berisha dhe Sali Berisha për lidhje me shtetasin Ndue Kalaj i dyshuar për ushtrimi i ndikimit të paligjshëm ndaj personave që ushtrojnë funksione publike, pjesëmarrja e gjyqtares Fatmira Hajdari, përbën shkak për njëanshmëri në shqyrtimin e çështjes.
“Në kushtet kur kallëzimi i Kuvendit implikon shtetasit Shkëlzen Berisha dhe Sali Berisha për lidhje me shtetasin Ndue Kalaj, i dyshuar për ushtrim të ndikimit të paligjshëm ndaj personave që ushtrojnë funksione publike, pjesëmarrja e gjyqtares Fatmira Hajdari në shqyrtimin e ankimit të depozituar nga Kuvendi, duke qenë se ka miqësi të afërt më familjen Berisha, përbën shkak për njëanshmëri në shqyrtimin e çështjes”, shprehej Balla në kërkesë.
Së fundmi, Gjykata e Apelit të Tiranës ka pranuar kërkesën e Kuvendit për të përjashtuar gjyqtaren Fatmira Hajdari nga shqyrtimi i çështjes së CEZ, duke arsyetuar se ka konflikt interesi me të paditurit, shkruan Dosja.al.
Seanca e radhës në Apel për këtë çështje është lënë më datë 24 qershor.
Kujtojmë se hetimet për privatizimin e OSSH nga CEZ, marrëveshje e vitit 2007, nisën në vitin 2016, ku Partia Socialiste akuzonte një sërë zyrtarësh të lartë të kohës së PD, përfshirë edhe Shkëlzen Berishën.
Më 24 janar 2020, Gjykata e Shkallës së parë në Tiranë vendosi mbylljen e dosjes “CEZ”, pasi gjyqtari Lazër Sallaku arsyetoi se nuk kishte prova.
Pas këtij vendimi, PS kërkoi rihetim, duke e dëguar çështjen në Apel, por gjykimi nuk ka nisur ende.
