Gazetarja e njohur Klodiana Lala ka zbuluar detajetë reja për dosjen e fundit të SPAK, ku në pranga kanë rënë ish-drejtori i policisë Erzen Breçani, si dhe shefi i krimeve në komisariatin numër 6 në Tiranë, Dedan Gjoni.
Nga përgjimet e ‘SKY’ dhe telefonatat e vazhdueshme mes Breçanit dhe Gjonit, u zbulua grupi kriminal ku mes tyre është djali i Breçanit, si dhe një tjetër emër i njohur për policinë, Ervin Mata.
Klodiana Lala deklaroi mbrëmë se nga përgjimet e “SKY” duket se kreu i kësaj bande kriminale është Ervin Mata. Sipas gazetares, ai duket se e urdhëronte djalin e Breçanit, i cili është i martuar me motrën e Ervin Matës.
Lala tha se Ervini ka lidhje shumë të forta me politikën në vend, ku thuhet se ka investuar paratë në disa biznese.
“Ervin Mata nuk është personazh i thjeshtë, pjesën më të madhe e kalon në Peru që ka lidhje të forta në vendet e BE, jo vetëm me kartele… ai ka pasur këtu dhe mbështetje politike, ai ka investuar paratë në biznes. Ai ka lëvizur në disa vende. Këtë verë në informacionet që kam, ka ardhur në Shqipëri, por nuk ishte i kërkuar”, tha ajo.
Por cila është historia e Ervin Matës me drejtësinë dhe krimin e organizuar?
Ervin Mata, si një emër i njohur për drejtësinë, i shppalur në kërkim ka patur përplasje me një nga emrat më të njohur të lojërave të fatit, Ervis Martinaj, i cili është shpallur i zhdukur prej shumë kohësh.
Ishte 4 tetori i vitit 2018 ku në një lokal në zonën e ish-Bllokut u përplasën me grushta e më pas me armë zjarri nga ku mbeti i vrarë trupëroja i Martinaj, Fabian Gaxha.
Konflikti ndodhi në kushtet kur në lokal ishin Ervis Martinaj dhe Eljon Hate ky i fundit i njohur edhe me emrin Esmeraldo, dhe 2 persona të tjerë të paidentifikuar, ndërsa diku më larg Ervin Mata bashkë me të dashurën e tij, këngëtaren Elvana Gjata, Fabio Alushin, Meviol Billon si dhe 2 të tjerë ende të paidentifikuar.
Duket se konflikti nisi se Mata i kërkoi llogari Gaxhës për një ngacmim që i kishte bërë të dashurës së tij dhe një vajze tjetër të showbizit. Në ato momente Elvana është larguar nga lokali, ku fill më pas nisi sherri fizik mes Matës dhe Gaxhës. Aty u përfshinë Ervis Martini dhe Eljon Hate.
Ky ishte momenti kur nisi shkëmbimi i zjarrit mes palëve dhe çasti kur Meviol Bilo shok i Matës qëlloi mbi grupin rival duke vrarë Fabian Gaxhan dhe duke plagosur Ervis Martinin dhe Eljon Haten.
