Në Afganistan ka ende njerëz që nuk janë evakuuar, pasi SHBA dhe aleatët e përfunduan këtë proces në 31 gusht, afati i fundit i vendosur nga talebanët. Gjermania vlerëson se ka ende midis 10,000 dhe 40,000 punonjës lokalë që punojnë për organizatat e zhvillimit në Afganistan, të cilët kanë të drejtë të evakuohen në Gjermani nëse mendojnë se janë të rrezikuar, tha kancelarja Angela Merkel të martën.
Duke folur në një konferencë shtypi në Berlin me homologun e saj austriak, Merkel tha se shumica e atyre që punonin për forcat e armatosura gjermane dhe policinë ishin tashmë jashtë Afganistanit, por që, meqenëse ndihma e zhvillimit për Afganistanin nuk ishte ndalur, shumë staf në atë fushë mbetën në vend.
“Për ne fokusi për momentin është stafi lokal dhe nuk janë 300 persona, ndoshta janë më shumë se 10-40,000 njerëz, dhe ne do të duhet të shohim se sa prej tyre duan të largohen nga vendi dhe sa jo,” tha ajo.
“Siç e kemi parë, askush nuk e merr lehtë vendimin për të lënë shtëpinë e tij”, u shpreh Merkel.
Ndërkohë, trupat amerikane u larguan nga Afganistani, pasi përfunduan misionin e tyre 20-vjeçar në vend. Zyrtarët amerikanë bënë me dije se rreth 123 mijë njerëz ishin evakuuar nga Afganistani me një mesatare prej 7500 evakuimesh në ditë.
