Kadri Kryeziu, ish-gjyqtar në Gjykatën Kushtetuese, ka thënë se seanca e sotme dëgjimore ndikon në vendimin përfundimtar të Gjykatës Kushtetuese për votën e deputetit Etem Arifi, për Qeverinë Hoti.
I ftuar në emisionin “Frontal” në T7, Kryeziu tha se derisa kolegji i gjyqtareve e konsideron se ka nevojë për seancë dëgjimore, atëherë duhet të ndodh. “Ndikon seanca dëgjimore në vendimin përfundimtar, në mënyrë që të ketë sa më shumë fakte, materiale, debate”, tha ai në Frontal.
Kujtojmë se ankesa në Kushtetuese e Vetvendosjes i përket një vote, që pretendohet se koalicioni qeveritar e ka fituar padrejtësisht.
Ndërkohë njohësi i Kushtetutës, Mazllum Bajraliu ka thënë se zyra e Presidentit duhet të shpallë zgjedhjet në rast se vota e deputetit Arifi shpallet jolegjitime dhe me këtë rast bie Qeveria. Bajraliu ka thënë se nuk mund të paragjykohet se cili do të jetë vendimi i Gjykatës Kushtetuese lidhur me votën e deputetit Etem Arifi.
“Nuk mund ta paragjykojmë. Ka shkelje procedurale dhe veprime materiale. Është vendimi i gjykatës supreme e kushtetuese. Kështu që është vështirë të paragjykohet se çfarë do të ndodhë dhe nëse do të vazhdohet apo jo mandati i tij. Vendimi i gjykatës është ende valid. Mbrojtja e këtyre ka lënë shumë për të dëshiruar, pasi nuk dua të tingëlloj negativ apo nënçmues. Më së miri është të mos paragjykojmë. Shohim çfarë do të ndodhë dhe pastaj e komentojmë”., tha juristi.
