Pak ditë më parë Neritan Ceka, ish-kreu i Aleancës Demokratike shpërtheu në mallkime të rënda ndaj shqiptarëve nëse ata do të shkonin të votonin.
Në emisionin “360 gradë” të Artur Zhejit, disa ditë më parë kur Ceka u pyet nga moderatori në lidhje me çdekretimin e zgjedhjeve nga presidenti Meta, ai nuk i kurseu aspak mallkimet për të gjithë shqiptarët që do të shkonin të votonin në 30 qershor.
Ai mallkoi me fjalët “Ju vraftë Zoti”, të gjithë ata që do t’u jepnin votën e tyre kandidatëve për kryetarë bashkie.
Mesa duket Ceka ka ndërruar mendje ditën e djeshme. Kjo ka ndodhur pasi fjalët e tij bënë xhiron e rrjetit, ndaj edhe i ka tërhequr mallkimet që ka thënë disa ditë më parë.
Tërheqja e mallkimeve të tij ka ndodhur po në emisionin e gazetarit Artur Zheji, ku është shprehur se i çmallkon të gjithë ata që për ideal të partisë nuk duan as ujë, as bukë dhe që do shkojnë të votojnë.
Ai deklaroi nga emisioni:
“Falenderoj të gjithë facebook-sat për këtë ngritje të papritur të realitetit tim. Kisha kohë që merresha vetëm me arkeologji edhe që më vunë në nivelin e Gjushit dhe Noces, por në një drejtim në krah të kundërt.
Tani mallkoj dhe çmallkoj dhe po e them publikisht. Çmallkoj të gjithë ata që për ideal të partisë, për të cilën nuk duan bukë as ujë, të shkojnë të votojnë në 30 qershor.
Çmallkoj të gjithë ata sidomos ata të lagjes sime, se unë jam tek lagja 5 ku janë gjithë sekretarët e komitetit qendror madje njëra me tha me atë që bën po pengon reformën zgjedhore”.
