Kreu i Partisë Demokratike, Lulzim Basha nuk ka pranuar edhe njëherë të përmendi emrat e oligarkëve, nga të cilët thotë gjithmonë se qeveria është e kapur. i ftuar në emisionin “Të paekspozuarit” e Ylli Rakipit, Basha i është shmangur sërish pyetjes duke thënë se oligark është Edi Rama.
Në momentin që Rakipi i kërkoi pesë emra oligarkësh, kryedemokrati tha pesë herë emrin e Ramës.
“Edi Rama, Edi Rama, Edi Rama, Edi Rama”, u përgjigj Basha.
Ndërkohë Rakipi tha shumë qartë se fakti që Basha nuk përmend emra, do të thotë se këta oligarkë, ashtu siç ishin në qeverisjen e Berishës e më pas të Ramës, do jenë edhe në qeverisjen e tij. Nga ana tjetër Basha sërish nuk përmendi emra.
“Një politikan që ka pushtetin, të japë koncesion, mund të kapë pronarë mediash, mund të ndërrojë njërin me tjetrin. Dokumentat janë aty. Kush ka shkelur ligjin do të japë llogari para ligjit. Për këtë kemi një platformë. Ligji anti mafia, ndjek parimin, që ndjek paranë për të shkuar tek përgjegjësia individuale. Ju keni qenë të pranishëm kur ne e kemi shpjeguar një ligj të bazuar në parimet e anti-mafias. Kjo është garancia që koncesionet do të hetohen.
Ç’do nëpunës publik, nga kryeministri, nuk do të kenë mundësinë t’i kthehen kësaj praktike të korruptuar. Sot mund të jetë dikush që shet dhallë, e merr i jep kontratë. Ata janë pjesë e sistemit por përzgjidhen nga i pari i sistemit”, tha kryedemokrati.
