Kryetarja e Partisë “Lëvizja për Ndryshim” deklaron se mund të bëjë koalicion me PD-në vetëm nëse në krye të saj nuk do të jetë Lulzim Basha.
“Kurrë nuk do t’jua mohoj ndihmën demokratëve. Bashkohem me ta për të plotësuar votat që na sjellin fitoren. Ama kam një kusht. Nuk mund të ketë Shqipëria një kryeministër të korruptuar. Asnjëri prej atyre të treve nuk duhet të jetë kryeministër. Këtë ma thotë shpirti,”– tha Topalli.
Në një intervistë për emisionin “Open” Topalli theksoi se nuk mund të bashkohet me një kryetar që sipas saj ka përgjysmuar, përçarë dhe fshirë historinë e Partisë Demokratike. Ajo tha se do të ishte e hapur për një bashkim opozitar, vetëm nëse në krye të PD-së do të vinte dikush tjetër.
“Kush nuk do e dëshironte të ishin të gjithë bashkë. Kush e përçau Partinë Demokratike, kush i përgjysmoi votat? Kush e fshiu historinë e Partisë Demokratike? Njeriu në jetë duhet të mbajë përgjegjësi, nuk është një tmerr për të liruar vendin brenda një force politike. Edhe unë dua të bashkohemi të gjithë bashkë. Këtë e bën një drejtues i ri dhe i pa korruptuar. Të gjejmë një kryetar të ri dhe të siguroj do të jemi të gjithë bashkë,” deklaroi Topalli.
/GazetaReforma.com/
