Shënohet viktima e parë prej zjarreve në Kosovë. Një person ka ndërruar jetë në Malishevë pasi është asfiksuar.
“Si pasojë e kësaj vdekje dyshohet të jetë ajri i tymosur pasi që viktima kishte shkuar tek stalla e cila ishte përfshirë nga zjarri”, konfirmoi Policia e Kosovës Viktima, identiteti i të cilit nuk bëhet i ditur, ishte dërguar pa shenja jete në qendrën mjekësore të Malishevës ku fatkeqësisht nuk ka mundur të mbijetojë.
Me vendim të prokurorit trupi i pajetë i viktimës është dërguar në morg për autopsi. Në Kosovë aktualisht janë 4 vatra zjarri aktive në rajonin e Prizrenit, Suharekës, Ferizajt dhe Rugovës. Në këtë rajon flakët janë në afërsi të banesave dhe rrezikojnë që ti djegin ato, ndërkohë që deri mbrëm bëhet me dije se asnjë ekip i zjarrfikësve nuk ka shkuar në vend.
Edhe në Shqipëri, situata nuk është aspak pozitive. Instituti i Gjeoshkencave, Energjisë, Ujit dhe Mjedisit parashikon që edhe sot, tre qarqet më të rrezikuara për t’u përfshirë nga flakët janë Fieri, Vlora dhe Gjirokastra. Dhe ashtu ka ndodhur, pasi në Lunxhëri të Gjirokastrës është riaktivizuar një tjetër vatër zjarri, e cila po luftohet nga 100 forca ushtarake. FA-të janë mbledhur për të shuar këtë vatër mes fshatrave Qestorat dhe Tranoshishtë, ndërsa nga ajti i ndihmon edhe helikopteri.
