Ditën e sotme ka reaguar edhe Ivi Kaso, anëtar i Komisionit të Rithemelimit të Partisë Demokratike për skandalin e nxjerrjes së rrogave, duke treguar se të tjera skandale do të “demaskohen”. Ai shprehet se databaza për pagat është vazhdim i publikimit të të dhënave për votuesit para zgjedhjeve.
Sipas tij, pas publikimit të dy listave të para qëndron dhe një listë e tretë që ka të dhëna më sensitive, pasi lidhet me kreditë, dhe do të shfaqë njëherë e mirë skandalet e politikanëve tanë, tha ai.
“Ka dyshime se databaza ishte në disa nivele, ishte niveli i parë që u bë publik dhe ky është niveli i dytë. Flitet që ka dhe nivele të tjera që kanë të dhëna akoma edhe më sensitive siç janë të dhënat bankare, regjistri i kredive që ekspozon përballë jo vetëm institucioneve shtetërore por edhe grupeve kriminale”, tha ai ne Euronews.
Sipas Kasos, drejtësia nuk e ka bërë punën e saj për të hetuar këtë skandal dhe gjithçka është trajtuar vetëm në kuadrin e shakave.
Ai shtoi se duhej të ishte ngritur një grup hetimi dhe të viheshin përballë përgjegjësisë institucionet.
Ivi Kaso shtoi se vetëm dje Gjykata e Lartë ka pushuar çështjen e “Patronazhistëve” duke e lënë atë përfundimisht si një çështje të rëndomtë.
