Kosova nuk do të kërkojë në kufi testet e COVID për shtetasit e Shqipërisë. Lajmi është bërë publik nga ministri i Shëndetësisë, Armend Zemaj, i cili gjatë takimit me ambasadorin e Shqipërisë, Qemal Minxhozi, tha se një masë e tillë nuk do të vendoset për Shqipërinë dhe as për shqiptarët e Luginës së Preshevës.
“Sapo u takova me ambasadorin e Republikës së Shqipërisë në Kosovë z.Qemal Minxhozi, të cilit i konfirmova se qytetarëve të Republikës së Shqipërisë që hyjnë në territorin e Republikës së Kosovës, nuk u kërkohet testi për COVID-19. Vendimi i Qeverisë së Kosovës është i bazuar në parimin e reciprocitetit. Si rrjedhojë, nuk kërkohen testime nga qytetarët e Kosovës dhe Shqipërisë dhe as nga bashkëqytetarët tanë nga Lugina e Preshevës. Bashkë me ambasadorin Minxhozi, u zotuam që do të vazhdojmë bashkëpunimin e ngushtë mes dy shteteve”, bëri me dije ministri Zemaj.
Shtimi i lartë i rasteve të reja me koronavirus në Kosovë ka detyruar autoritetet të rikthejnë disa kufizime shtesë, për të bërë të mundur parandalimin e përhapjes së mëtejshme të virusit.
