Ministrja e Arsimit, Evis Kushi ka qenë ditën e sotme në Universitetin Politeknik të Tiranës dhe në Universitetin e Arteve. Ajo është takuar me studentët dhe u ka bërë thirrje që të vaksinohen, ndërsa i uroi suksese në këtë vit akademik.
“Ju jeni të rinj, bëni jetë sociale, hyni në kinema, bare etj. Prandaj, vaksinimi ju duhet. Madje, edhe për udhëtim jashtë vendit, certifikata e vaksinimit është e nevojshme. Shumë suksese të gjithëve në këtë vit akademik!”, ka thënë Kushi.
Ministrja më tej ka thënë se secili duhet të bëjë detyrën e tij qytetare sa kohë virusi është ende në qarkullim. Kushi tha se në këtë mënyrë secili do të jetë më i mbrojtur dhe një vit i mbarë akademik do të jetë i garantuar.
“Nëse ne jemi të gjithë të ndërgjegjësuar e të vaksinuar, patjetër që ky vit akademik do të shkojë sa më mbarë. Ne që jemi të shëndetshëm, e kemi dyfish më të madh detyrimin për t’u vaksinuar që të mbrojmë edhe ata që janë më të rrezikuarit. Dhe në këtë rast, më të rrezikuarit janë pedagogët tuaj, stafi akademik dhe prindërit që keni në shtëpi. Dua që të jemi të gjithë bashkë në këtë betejë. Dhe për sa kohë virusin e kemi akoma mes nesh, duhet ta kuptojmë që secili të bëjë detyrën e tij. Kjo është edhe një detyrë qytetare. Nëse secili bën detyrën e tij, të gjithë bashkë jemi më të mbrojtur dhe do të garantojmë një vit të mbarë akademik”, ka Kushi.
