Çadra e Cirkut Kombëtar në Tiranë, ku artistët kanë dhënë shfaqje për 62 vite është shembur nga përmbarimi. Artistët kanë dalë në protestë para ministrisë për të kërkuar një zgjidhje, por asnjë përgjigje nuk ka ardhur ende në drejtim të tyre.
Në një lidhje për emisionin “Shqipëria Live”, akrobati Rubin Zuna ka thënë se në atë cirk kanë interpretuar figura të shquara të artit, ndër to edhe gjyshi i tij. Ai ka thënë se Ministria e Kulturës i ka braktisur, ndërsa ka treguar se akrobatët nuk po stërviten më. Zuna tha se ka shkuar si çdo mëngjes për në punën e tij, po ka hasur me përmbarimin që i ka thënë se ndërtesa nuk është më pronë e tyre.
“Në atë cirk kanë interpretuar gjyshi, nuk ndihem mirë, është shkatërruar çdo gjë dhe e prisja që kështu do të ndodhte, i kemi mbush xhepat me këto premtime. Duam ndihmë, do të shkojmë nesër në punë. Pse nuk ishte asnjë nga ministria kur u shkatërrua çadra? Mos të bëjmë që nuk e dinim. Jemi të braktisur”, tha ai.
“Na thanë se nuk do të prishet çadra. Ata janë përmbarues privatë. Ministria na tha që nuk do të prishet. Ku do të shkojmë ne si artistë cirku. Ne tani nuk po stërvitemi më, shkova si çdo mëngjes po hasëm me ata të përmbarimit, na thanë jo më nuk është më pronë e juaja, shkoni ku të doni”, tha Zuna.
I pyetur nëse ka pasur negociata me Ministrinë e Kulturës, Zuna ka thënë se me këtë janë marrë sindikatat. Ai shtoi se veç çadrës u kanë marrë edhe palestrën.
“Me këtë punë janë marrë sindikatat, me çfarë kam dëgjuar janë bërë negociatat, por përgjigjet janë po po pa merak. Siç na thanë dje që plani A është akoma. Është bastarduar arena e cirkut në mes të Tiranës. Kemi qenë pa gjumë gjithë natën, stres. Na thanë që do të luftojmë fort që të mos prishet. Veç çadrës na kanë marrë edhe ambientet e palestrës. Cirkun e bëjnë artistët jo çadra, thonë, por në të vërtetë cirkun e bën çdo gjë”, tregoi akrobati.
Zuna ka thënë se ata do të luftojnë që të gjejnë një terren tjetër. Por ai ka shtuar se ndërkohë që prishet cirku ekzistues, nuk ka një të ri.
“Ishim në protestë se prisnim ndonjë reagim. Do luftojmë që të gjejmë një terren tjetër, edhe pse jam që mos të s’postohet, se e di se sa e bëjnë ata cirkun e ri. Këtu na prishet cirku ekzistues, këtej nuk kemi një të ri. Se dinë ata që cirku ka vegla specifike, nuk mund të bëhet në çdo vend”, tha Zuna.
