Detaje të reja janë bërë me dije për plagosjen me armë zjarri që ndodhi mbrëmjen e sotme në Tiranë. Mësohet se dy të plagosurit, Jetmir Marashi, 28 vjeç dhe Altin Gjoka, 32 vjeç, janë shokë me njëri-tjetrin. Ata të dy kanë pretenduar se janë qëlluar me armë zjarri nga Aldo Gjini. Ky i fundit është shpallur në kërkim nga policia dhe për të bërë të mundur arrestimin e tij janë ngritur dhe postblloqe.
Ndër të tjera bëhet me dije se dy të rinjtë që u plagosën kanë qenë duke pirë kafe në një lokal pranë pallateve “Grand”, ku kanë pasur edhe konfliktin me autorin e ngjarjes. Ndërkohë, ngjarja mund të jetë regjistruar e gjitha nga kamerat e sigurisë së lokalit.
Por e gjitha ka nisur pasi autori dhe dy të plagosurit kanë përplasur makinat. Fillimisht të rinjtë janë konfliktuar verbalisht, por më pas situata ka agravuar deri në përdorimin e armëve.
Fill pas plagosjes autori është larguar menjëherë nga vendi i ngjarjes, ndërkohë që policia po punon intensivisht për kapjen e tij.
Nuk janë bërë ende shumë detaje rreth gjendjes së dy të plagosurve, por mësohet se Altin Gjoka ka marrë një plumb në shpatull, ndërsa Jetmir Marashi ka një plagë tejshpuese në gjoks dhe pritet t’i nënshtrohet operacionit.
