JD Vance ka folur sot për herë të parë pas zgjedhjes së tij nga Donald Trump për të qenë zv/presidenti i tij, nëse republikani do të arrijë të mposhtë Joe Biden në zgjedhjet presidenciale të nëntorit në SHBA. Vance e cilësoi Trumpin si një “lider të vërtetë” që ka arritur të ulë temperaturën në skenën politike të vendit.
“Mediat vazhdojnë të thonë se duan që dikush të ulë temperaturën,” tha Vance. “Epo, Donald Trump u qëllua dhe ai uli temperaturën. Kështu bën një lider i vërtetë,” shtoi ai.
Vance vazhdoi duke sulmuar administratën aktuale të Biden-Harris, duke thënë: “Është koha për të hequr qafe regjimin e korruptuar Biden-Harris që ka thyer këtë vend, ka shkatërruar reputacionin e tij në botë dhe më e rëndësishmja, e ka bërë jetën e klasës së mesme më pak të përballueshme për qytetarët tanë.”
Zgjedhja e tij ka shkaktuar polemika mes demokratëve për shkak të qëndrimeve të tij të mëparshme lidhur me ndihmën për Ukrainën, për të cilën ai ka deklaruar se “nuk i intereson.”
