Intensifiklimi i fushatës elektorale dhe afrimi i zgjedhjeve të prillit vitin e ardhshëm, kanë bërë që kryeministri Rama të rihapë ‘thesin’ e premtimeve ku aeroportet dhe parqet energjetike janë kryefjala.
Nisur nga kjo, javën e ardhshme pritet që të zhbllokohet procesi për aeroportin ndërkombëtar të Vlorës. Kështu deklaroi sot kryeministri Rama, gjatë aktivitetit ku u hap gara për një tjetër park fotovoltaik, në Spitallë të Durrësit.
“Shumë shpejt ne do të jemi këtu përsëri me ndihmën e Zotit, sepse mbase javën e ardhshme do të zhbllokojmë dhe procesin për aeroportin ndërkombëtar të Vlorës, gjë për të cilin kemi bërë përpjekje, të cilin e konsideroj një tjetër gur shumë të rëndësishëm të mozaikëve të Shqipërisë që përfytyrojmë”,- deklaroi kryeministri Rama.
Kryeministri tha se, pas parkut do të shoqërohet me një sërë hapash të tjerë, siç është ndërtimi i portit të madh turistik që do t’i japë Durrësit magnetin e fuqishëm jo vetëm për të tërhequr më shumë turistë, por për të krijuar një kategori për turizmin siç është ai elitar.
“Ky park fotovoltaik në zonën e Spitallës faktikisht është pjesë e një mozaiku që jetëson vizionin tonë për Durrësin e 2030-s dhe patjetër edhe vizionin tonë për Shqipërinë e 2030. Ne në këtë zonë, e cila prej shumë e shumë vitesh ka qenë një zonë e parë si një periferi ku ka pasur hapësirë vetëm për ndërtime kaotike.
Me këtë park bëjmë vetëm hapin e parë sepse kjo do të shoqërohet me një sërë hapash të tjerë, nga lagja e re e rindërtimit. Një lagje e re po aq mbresëlënëse sa edhe shkollat që po rindërtohen”,- vijoi më tej kryeministri.
Ministrja e Energjisë dhe Infrastrukturës, Belinda Balluku, dha detaje për projektin e parkut fotovoltaik në Spitallë.
“Parku fotovoltaik i Spitallës nuk do të ndikojë në mjedisin e zonës ku ndërtohet. Ky park që shtrihet në 120 hektarë do të prodhojë fuqi maksimale prej 100 megavat, nga të cilat 70 megavat do të blihen nga Operatori i Shpërndarjes së Energjisë Elektrike, pjesa tjetër do të disponohet në treg të lirë nga prodhuesi.
Çmimi do të vendoset nëpërmjet ankandit. Tavani nga i cili fillojmë është 55 euro për megavat dhe nuk do të pranohet asnjë ofertë mbi këtë çmim. Gara ndërkombëtare pritet të mbyllet më 2 mars të vitit 2021”,- tha Balluku.
/GazetaReforma.com/
