Xhudistja Distria Krasniqi bëri histori teksa ia doli të fitonte medaljen e parë të arit për Kosovën në Olimpiadën e “Tokyo 2020”. Sportistja mposhti në finale japonezen Funa Tonaki, pasi në gjysmëfinale kishte mposhtur kundërshtaren Urantsetseg Munkhbat.
Pas Medaljes së Artë, xhudistja ka folur për gazetën Express dhe ka thënë se është shumë krenare që është bërë pjesë e historisë së Kosovës pas shumë mundi e sakrifice. Ajo tha se medalja olimpike ishte e vetmja që i mungonte në koleksionin e saj dhe është edhe më e lumtur që ajo ishte një medalje e artë.
“Koleksionit të medaljeve të mija i ka munguar vetëm medalja olimpike dhe jam shumë e lumtur që sot e mora medaljen e më e lumtur që ajo medalje është e artë. Jam shumë krenare që jam bërë pjesë e historisë së Kosovës pas shumë mundi e sakrifice”, tha Distria.
Distria Krasniqi ia doli të fitonte Medaljen e Arit në peshën deri në 48 kilogramë, deri tani e vetmja në këtë Olimpiadë. Por kjo nuk është medalja e parë për Kosovën në Lojërat Olimpike. Majlinda Kelmendi arriti të fitonte Medaljen e parë të Artë sërish në sportin e xhudos në kategorinë deri në 52 kilogramë, në Olimpiadën “Rio 2016” në Brazil.
