GJKKO ka refuzuar kërkesën e ish-gjyqtares së Elbasanit, Pajtime Fetahu, për zëvendësimin e masës së sigurisë “arrest në burg” me një masë më të lehtë.
E arrestuar dhe mbajtur në burgun e Pojskës në Pogradec, ish-gjyqtarja argumentoi se duhej liruar për arsye shëndetësore, duke paraqitur ekspertiza mjekësore për të mbështetur këtë kërkesë.
Megjithatë, pas shqyrtimit të provave, trupi gjykues i drejtuar nga gjyqtari Erjon Çela vendosi të mos ndryshojë masën e sigurisë, duke arsyetuar se dokumentacioni nuk e justifikonte lirimin e saj.
Sipas njoftimit zyrtar të GJKKO-së, kërkesa e Fetahut u depozitua më 27 janar 2025, duke kërkuar zëvendësimin e masës së sigurisë të përcaktuar më parë me vendimet nr. 138 dhe nr. 146 të nëntorit 2024. Gjykata vendosi:
• Rrëzimin e kërkesës për ndryshimin e masës së sigurisë;
• Vazhdimin e mbajtjes në burg të ish-gjyqtares.
Vendimi mund të apelohet brenda 5 ditëve në Gjykatën e Posaçme të Apelit për Korrupsionin dhe Krimin e Organizuar.
Pajtime Fetahu dhe lidhjet me grupet kriminale
Ish-gjyqtarja Pajtime Fetahu është subjekt i dy dosjeve të SPAK, të lidhura me grupin e Suel Çelës dhe organizatën “Çopja” në Elbasan.
Fillimisht, ndaj saj ishte vendosur masa e sigurisë “arrest shtëpie”, por më pas ajo u arrestua me vendim gjykate për përfshirjen e saj në një tjetër hetim të SPAK.
Fetahu dha dorëheqjen nga sistemi i drejtësisë më 16 nëntor 2022, vetëm pak ditë përpara se të përballej me procesin e vettingut.
Në fund të vitit 2024, SPAK goditi organizatën kriminale të Suel Çelës, duke lëshuar 21 masa sigurie për persona të përfshirë në krimin e organizuar, ish-zyrtarë të drejtësisë, policisë dhe dy gazetarë.
Hetimet zbuluan dy raste të trafikut të kokainës nga Amerika Latine drejt vendeve të Bashkimit Europian. Sipas SPAK, banda e Çelës përdorte paratë nga ky trafik për të financuar eliminimin e kundërshtarëve në Elbasan dhe për të korruptuar funksionarë të drejtësisë, policisë dhe medias.
Në bashkëpunim me autoritetet belge, franceze dhe ekuadoriane, hetimet treguan se fitimet nga trafiku i drogës ktheheshin në para cash në Shqipëri dhe më pas investoheshin në biznese të ndryshme, duke u kamufluar si të ligjshme.
