Ditën e sotme, Ministria e Shëndetësisë njoftoi një rekord të ri infektimesh me COVID-19, në të gjithë vendin janë regjistruar 289 raste të reja nga 1402 testime të kryera.
Nga këto vetëm 19 raste u konfirmuan në qytetin e Vlorës. Mes të prekurve rezulton të jetë një sanitare që punon në drejtorinë e kujdesit shëndetësor. Raste pozitive ka pasur edhe në Kadastër dhe konvikte.
Ndërkohë mësohet se pozitiv me Covid-19 ka rezultuar dhe një punonjës i Bashkisë së Selenicës. Rastet e tjera të konfirmuara me COVID-19 janë pensionistë dhe persona të biznesit privat.
Në Vlorë deri më tani janë shënuar 224 raste aktive. Gjithashtu në 24 orët e fundit në gjithë vendin 4 persona kanë humbur jetën. Një prej tyre është një 37-vjeçar nga Korça i cili sipas njoftimit të Ministrisë së Shëndetësisë ishte pa sëmundje bashkëshoqëruese. Ndërkohë betejën me koronavirusin e kanë humbur dhe një 52 vjeçare nga Mirdita, një 81 vjeçar nga Tirana dhe një 85 vjeçar nga Fier.
