Janë gjithë këto ditë që trumbetohet se deputetët zëvendësues të opozitës nuk do t’i pranonin mandatet e tyre, por mesa duket nuk ka ndodhur kështu. Janë katër deputet të Lëvizjes Socialiste për Integrim që e kanë pranuar mandatin dhe bëhet fjalë për : Ylli Shehun, Aurora Marën, Enver Roshin dhe Edmond Rrushin, të cilët tashmë e kanë dorëzuar formularin e dekriminalizimit në KQZ.
Listës së LSI-së mund t’i shtohet edhe Ralf Gjoni, i 11-i në listën e Tiranës. Ai nuk ka pranuar të firmosë heqjen dorë nga mandati, sipas kërkesës së LSI dhe ka deklaruar pas një takimi me eurodeputetin Knut Fleckenstein se do të vendosë për mandatin, pasi të thirret nga Komisioni Qendror i Zgjedhjeve dhe pas disa konsultimeve. Ndërkohë Lefter Koka, i pari i listës së Durrësit nuk e dorëzoi mandatin.
Nga Partia Demokratike kanë refuzuar kërkesën e selisë blu për të hequr dorë nga mandati Ligoraq Karamelo, i 6-i në qarkun e Korçës dhe Lefter Maliqi, i treti në qarkun e Beratit, por që në vitin 2017 bëri fushatë për Partinë Socialiste dhe sot mban detyrën e Zëvendësdrejtorit të Përgjithshëm të Burgjeve. Ndërsa Mylsim Murrizi dhe Rudina Hajdari nuk i kanë dorëzuar mandatet.
Mesditën e të mërkurës, Partia Demokratike dorëzoi në KQZ dorëheqjet e 38 kandidatëve të listës pritëse.
