Të gjithë ata që kanë prenotuar dhe paguar pushimet në muajt e parë të vitit do të marrin kupona ose do të rimbursohen brenda vitit nga agjencitë dhe operatorët turistikë.
Në një kohë kur askush nuk e dinte se çfarë do të ndodhte në muajt në vijim dhe sesi do të ishte ecuria e COVID-19, shumë qytetarë bënë rezervime dhe parapagesa për pushimet e tyre tek agjencitë turistike që ofrojnë këto shërbime.
Këshilli i Ministrave dhe Ministria e Turizmit dhe Mjedisit ka menduar edhe për këtë pjesë, me anë të një akti normativ i cili ka për objekt përcaktimin e masave që do të merren për turizmin, agjencitë turistike, operatorët dhe klientët e tyre në ofrimin e një shërbimi udhëtimi nga dita e shpalljes e deri në përfundim të fatkeqësisë natyrore të shkaktuar nga COVID-19.
Ky akt parashikon që operatorët dhe agjencitë turistike që kanë lidhur kontrata për ofrimin e shërbimeve të udhëtimit me klientë që kanë parapaguar para shpalljes së gjendjes së jashtëzakonshme nga COVID-19, të rimbursohen brenda një viti, nga hyrja në fuqi e këtij akti.
Klienti i cili ka lidhur një kontratë me operatorët turistikë për shërbimin që ato ofrojnë dhe ka bërë një parapagesë para shpalljes së gjendjes së jashtëzakonshme do të rimbursohen brenda një viti nga hyrja në fuqi e këtij akti.
Gjithashtu edhe mjetet e transportit ajror, detar dhe të ujërave të brendshme që nuk realizojnë dot transportin e e klientëve si pasojë e masave kufizuese të marra në kuadër të fatkeqësisë natyrore, janë të detyruara të njoftojnë klientin, agjencitë turistike apo operatorët për pamundësinë e zbatimit të kontratave të transportit duke bashkëlidhur të gjithë dokumentet e nevojshme.
Ky komunikim midis gjitha palëve të përfshira bëhet brenda 30 ditësh nga:
1)hyrja në fuqi e këtij akti normativ
2)data e planifikuar e nisjes apo mbërritjes për shërbimet/kontrat brenda afatit.Operatorët turistikë apo/ose agjencitë e udhëtimit brenda 30 ditësh nga komunikimi duhet të rimbursojnë klientët nëpërmjet lëshimit të një kuponi(voucher) i cili ka të njëjtën vlerë me shumën totale që duhet të kthehet, duke i ofruar klientit mundësinë e përdorimit të këtij kuponi për shërbime të ngjashme brenda një viti.
Operatorët turistikë apo/ose agjencitë e udhëtimit që nuk zbatojnë këtë akt normativ, përveç përmbushjes së detyrimeve kontraktuale me klientët, dënohen me gjoba për kontratat e parealizuara.
Burimi/tiranapost.al
