Ushtria izraelite ka njoftuar planet për të marrë nën kontroll rreth 75% të territorit të Gazës brenda dy muajsh, sipas raporteve nga mediat lokale.
Ky zhvillim ndodh ndërsa Izraeli intensifikon ofensivën e tij në Gaza, duke synuar të ushtrojë presion mbi Hamasin për lirimin e pengjeve izraelite të mbetura në duart e këtij grupi militant.
Në kuadër të operacionit të zgjeruar ushtarak, Izraeli ka njoftuar se nga e hëna do të nisë një mekanizëm të ri për shpërndarjen e ndihmave humanitare, duke detyruar popullsinë palestineze të përqendrohet në tri zona të vogla brenda Gazës, për të më pas pushtuar pjesën tjetër prej tre të katërtave të territorit.
Forcat Izraelite të Mbrojtjes kanë bërë të ditur se ofensiva e tyre tashmë nuk është thjesht një luftë kundër Hamasit, por synon pushtimin e territorit, kontrollin e shpërndarjes së ndihmave dhe shkatërrimin e infrastrukturës së grupit militant.
Ndërkaq, Hamasi kishte propozuar lirimin e pengjeve në këmbim të një armëpushimi dhe tërheqjeje ushtarake izraelite, por kryeministri izraelit Benjamin Netanyahu e hodhi poshtë këtë ofertë, duke deklaruar se synimi i Izraelit është marrja e kontrollit total të Gazës dhe vendosja e një sistemi të ri shpërndarjeje ndihmash që përjashton Hamasin.
Gjatë gati tre muajve të fundit, Izraeli ka bllokuar plotësisht hyrjen e ushqimeve, ilaçeve dhe karburanteve në Gaza, duke nxitur kritika ndërkombëtare për rrezikun e urisë masive.
Javën e kaluar, një sasi e vogël ndihmash u lejua të hynte në Rrip, por OKB dhe organizatat humanitare paralajmëruan se kjo është shumë pak për të përballuar krizën.
Vetëm dje, një fëmijë 4-vjeçar humbi jetën si pasojë e urisë.
Shteti hebre po zbatojnë një plan të ri, i mbështetur nga SHBA, për të menaxhuar shpërndarjen e ndihmave në Gaza, por drejtuesi amerikan i këtij projekti dha dorëheqjen papritur, duke thënë se nuk kishte pavarësi në veprimet e organizatës së tij.
Në anën tjetër, OKB ka refuzuar përfshirjen në këtë plan, duke e cilësuar atë si jo të paanshëm dhe të kontrolluar politikisht.
Gjatë 24 orëve të fundit, sulmet izraelite kanë shkaktuar vdekjen e të paktën 38 personave, përfshirë fëmijë, sipas burimeve zyrtare shëndetësore.
Këto shifra nuk përfshijnë viktimat në spitalet e bllokuara në veri të Gazës, të cilat janë të rrethuara nga forcat izraelite dhe të paarritshme për ndihmën e jashtme.
