Izraeli ka paralajmëruar një valë të re sulmesh masive në Teheran, ndërsa tensionet me Iranin kanë hyrë në ditën e pestë të përshkallëzimit ushtarak.
Ministri izraelit i Mbrojtjes, Israel Katz, deklaroi se sulmet e radhës do të jenë “shumë të fuqishme” dhe se qytetarët e Teheranit do të paralajmërohen paraprakisht.
“Do të godasim objektiva me rëndësi të lartë në kryeqytetin iranian. Nuk do të ndalemi, goditjet ndaj Iranit do të jenë të rënda dhe të vazhdueshme,” deklaroi Katz.
Ndërkohë, mediat iraniane raportuan për shpërthime të forta në qytetin e Isfahanit, një zonë e ndjeshme ku ndodhen disa nga qendrat kryesore bërthamore të Iranit.
Në Tel Aviv, janë dëgjuar sirena alarmi për të paralajmëruar qytetarët për sulme të mundshme hakmarrëse nga Irani.
Në këtë klimë të tensionuar, presidenti amerikan Donald Trump ka kërkuar një “përfundim të vërtetë” të konfliktit, ndërsa pritet të mbledhë Këshillin për Siguri Kombëtare në Uashington.
Gjatë një deklarate për shtyp nga Kanadaja, ku ndodhej për samitin e G7-ës, Trump shprehu zemërim për mungesën e marrëveshjes bërthamore me Iranin.
“Nuk po kërkojmë armëpushim. Po kërkojmë diçka më të madhe se kaq,” tha ai, duke lënë samitin përpara përfundimit dhe duke nënvizuar mbështetjen e plotë për ofensivën izraelite ndaj programit bërthamor të Teheranit, të cilin Irani këmbëngul se është për qëllime civile.
