Izraeli ka intensifikuar ofensivën ushtarake në Rripin e Gazës, me një valë të re bombardimesh nga deti dhe toka në pjesën veriore të territorit palestinez.
Sipas autoriteteve lokale, sulmet e fundit kanë shkaktuar mbi 90 viktima brenda 24 orëve të fundit, përfshirë gra dhe fëmijë.
Mes të vrarëve është edhe Marwan al-Sultan, kardiolog dhe drejtor i spitalit indonezian në veri të Gazës, i cili humbi jetën bashkë me gruan dhe pesë fëmijët e tij pas një sulmi ajror.
Shifrat zyrtare nga Gaza flasin për rreth 300 të vrarë vetëm gjatë kësaj jave, ndërkohë që mijëra persona janë plagosur.
Pavarësisht përshkallëzimit të dhunës, në horizont po shfaqen sinjale për një marrëveshje të mundshme armëpushimi.
Presidenti amerikan Donald Trump deklaroi se Izraeli ka pranuar një draft propozimi që përfshin:
• Një pauzë 60-ditore të luftimeve
• Tërheqje të pjesshme të ushtrisë izraelite
• Lirim të pjesshëm të pengjeve të mbajtura nga Hamasi
Kryeministri Benjamin Netanyahu pritet të udhëtojë të dielën drejt Uashingtonit për bisedime me zyrtarë të lartë amerikanë.
Ndërkohë, Hamasi do të japë përgjigjen e tij për ofertën e propozuar gjatë ditës së premte, megjithëse burime të brendshme flasin për përçarje mes udhëheqjes politike të grupit jashtë Gazës dhe militantëve brenda territorit.
Prej dështimit të armëpushimit të fundit në muajin shkurt, sipas burimeve palestineze, më shumë se 6,500 njerëz kanë humbur jetën në Gaza.
Bllokada e pjesëshme që vazhdon të mbajë të izoluar Rripin, ka shkaktuar krizë të thellë humanitare, ku shumë civilë janë vrarë gjatë përpjekjeve për të siguruar ndihma ushqimore.
