Forcat e Mbrojtjes së Izraelit njoftuan të premten se kanë ndërmarrë një seri sulmesh ajrore në territorin iranian, duke shënjestruar dhjetëra objektiva me rëndësi ushtarake dhe strategjike gjatë natës.
Sipas deklaratës së ushtrisë izraelite, objektivat përfshinin qendra të prodhimit të raketave si dhe një strukturë të ndjeshme kërkimore në kryeqytetin Teheran.
“Disa vende industriale për prodhimin e raketave në zonën e Teheranit u goditën,” njoftoi IDF, duke theksuar se objektivat ishin të lidhura me prodhimin e komponentëve dhe motorëve të raketave, pjesë qendrore të infrastrukturës ushtarake të Ministrisë së Mbrojtjes iraniane.
Në këtë operacion u angazhuan mbi 60 avionë luftarakë të Forcave Ajrore izraelite. Mes objektivave ishte edhe selia e programit SPND, një strukturë kërkimore dhe zhvillimore që, sipas Shteteve të Bashkuara, përfaqëson vazhdimin e programit bërthamor iranian që daton para vitit 2004.
Sulmet, të cilat ndjekin një klimë të tensionuar në rajon, përbëjnë një ndër goditjet më të thella që Izraeli ka ndërmarrë brenda territorit iranian, duke vënë në shënjestër direkt kapacitetet strategjike dhe kërkimore të Republikës Islamike.
