Ditën e sotme policia e Tiranës ka sekuestruar 1 500 000 euro llogari bankare që i përkasin ish-zyrtarit Ferdinand Shehu.
Në vitet 2006-2011, ai ka mbajtur funksione zyrtare në Agjencinë e Legalizimit, Urbanizimit dhe Integrimit të Zonave Urbane.
Ky shtetas dyshohet se ka konsumuar veprën penale “Pastrimi i produkteve të veprës penale”, parashikuar nga neni 287 i Kodit Penal, duke kryer disa investime në pasuritë e paluajtshme.
Lajmi është përhapur me shpejtësi në të gjitha mediat, ku nga ana tjetër ka ardhur edhe reagimi i Shehu.
Ai ka reaguar duke u shprehur se ndodhet në Itali dhe se transaksioni që do kryhej është në përputhje me ligjet shqiptare. Shehu informon se do të kthehet shumë shpejt në Shqipëri për të sqaruar gjithçka që po flitet për të në media.
“Aktualisht ndodhem në Itali, nuk kam asgjë për të fshehur, do të kthehem në Shqipëri. Transaksioni që po kryeja ishte në përputhje me ligjet shqiptare, në rrugë bankare dhe noter. Do të ndjek të gjitha rrugët ligjore për të cilën nga ky moment është ngarkuar avokatja ime. Do të ndjek të gjitha rrugët ligjore për të cilën nga ky moment është ngarkuar avokatja ime”, ka thënë ai.
