Një tërmet i fuqishëm ka goditur Italinë qëndrore mëngjesin e sotëm.
Mësohet se tërmeti që “shkundi” vendin fqinj ishte me magnitudë 5.7 Rihter.
Tërmeti kishte një thellësi prej 10 kilometrash, bën të ditur Qendra Sizmologjike Evropiane Mesdhetare. Ndërkohë që epiqendra e tërmetit u shënua në bregdet, rreth 64 km në lindje të Rimini.
Theksojmë se tërmeti u pasua nga 3 tërmete të tjera me magnitudë 4.0, 3.6 dhe 3.9 Rihter. Nga kontrollet e para të kryera nga zjarrfikësit dhe mbrojtja civile nuk raportohet për dëme në njerëz apo në ndërtesa.
Lëkundjet e forta sizmike kanë panikosur banorët e Italisë qendrore, të cilët kanë nxituar të dalin nëpër rrugë. Transporti hekurudhor u pezullua si masë paraprake në Ankona, për shkak të dyshimeve për dëmtim të binarëve derisa të kryen kontrollet.
Kryetari i bashkisë së Senigallia në provincën e Ankonës, Massimo Olivetti, ka urdhëruar mbylljen e shkollave dhe të të gjitha instuticioneve për të verifikuar qëndrueshmërinë e ndërtesave. I njëjti vendim u mor në Fano, Pesaro dhe Ankona: shkollat e të gjitha niveleve u mbyllën deri në një vendim të dytë.
Ndërkohë zjarrfikësit e Ankonës raportojnë se klinika private Villa Igea po evakuon pjesërisht strukturën. Tërmeti është ndjerë në pothuajse të gjithë Italinë qendrore dhe veriore. Në Bolonja dhe Romagna tronditja është ndjerë veçanërisht në katet e sipërme të ndërtesave.
