Pas Francës, edhe qeveria italiane po mendon të vendosë kufizime për njerëzit e pavaksinuar, ndërsa rastet me Covid-19 kanë ardhur në rritje. Ministrat do të takohen të enjten në mbrëmje për të miratuar një dekret që mund të rezultojë në miratimin e kufizimeve të ngjashme si ato në Francë.
Kjo do të thotë se njerëzit mund të hyjnë në stadium, muze, teatër, kinema, pishina, palestra, klube nate etj. vetëm duke paraqitur “kartën e gjelbër” që tregon se janë vaksinuar. Diçka e tillë mund të kërkohet edhe për të udhëtuar Brenda vendit me tren, aeroplan ose autobus me distancë të gjatë.
Lidhur me kufizimet e menduara, partitë e koalicionit qeverisës së kryeministrit Mario Draghi kanë pasur debate nëse duhet të kërkohet leje për t’u shërbyer brenda në bare dhe restorante.
Nuk është bërë ende me dije se kur do të hyjnë në fuqi kufizimet e pritshme, por disa gazeta italiane thonë se mund të fillojnë që nga 26 korriku ose javën e ardhshme.
Ndërkohë, për personat e vaksinuar plotësisht, “leja e gjelbër” do të jetë e vlefshme 14 ditë pas dozës së dytë dhe ka afat për 9 muaj. I vlefshëm do të jetë edhe një test negative i Covid-19 i kryer në 48 orët e fundit, apo pë rata që e kanë kaluar virusin.
Të enjten, Italia regjistroi 5,057 raste të reja koronavirus, kryesisht të nxitura nga varianti Delta, krahasuar me 4,259 një ditë më parë. Kishte 15 vdekje të tjera të lidhura me Covid, duke e çuar totalin në 127.920 – numrin më të lartë të vdekjeve në Evropë pas Mbretërisë së Bashkuar.
