Qeveria italiane ka miratuar dekretin për hyrjen në fuqi të masave të reja kufizuese, ndërsa tashmë njerëzit duhet të jenë të vaksinuat në mënyrë që të përdorin disa prej shërbimeve apo për të hyrë në ambiente të caktuara.
E ashtuquajtura “leja e gjelbër” është një certifikatë dixhitale ose letre që tregon nëse dikush ka marrë të paktën një dozë të vaksinës, është testuar negativ ose është rikuperuar kohët e fundit nga COVID-19.
Që nga 6 gushti, leja do të kërkohet për të shkuar në palestra, pishina, stadiume sportive, muze, spa, kazino dhe kinema. Të hash në restorante të mbyllura kërkon gjithashtu edhe një leje. Përpos këtyre është zgjatur edhe gjendja e jashtëzakonshme. Ajo ishte e vlefshme që nga 31 janari i vitit 2020 dhe pritej të skadonte në 31 korrik, por tashmë është shtyrë për në 31 dhjetor.
“Leja e gjelbër është thelbësore nëse duam t’i mbajmë bizneset të hapura”, u tha kryeministri Mario Draghi gazetarëve.
“Leja e gjelbër” u prezantua në Itali muajin e kaluar, por deri më tani ajo ishte e nevojshme vetëm për udhëtime brenda Bashkimit Evropian dhe për të fituar akses në shtëpitë e kujdesit ose pritjeve të mëdha të dasmave brenda Italisë.
Vendimi i qeverisë italiane pasoi një lëvizje të ngjashme nga Franca këtë muaj dhe nënvizon shqetësimin në rritje për variantin shumë ngjitës Delta. Numri i infeksioneve të reja të koronavirusit të regjistruar në Itali është dyfishuar gjatë javës së kaluar, duke arritur 5,057 të enjten.
