Italia jugore është përfshirë nga zjarret masive, një ditë pasi një stacion monitorimi në Sicili raportoi temperatura prej 48.8 Celsius, e cila mund të jetë më e larta në historinë evropiane. Temperatura rekord, e cila ende duhet të verifikohet nga Organizata Botërore Meteorologjike (ËMO), u raportua pranë qytetit të Sirakuzës, në juglindje të ishullit të Sicilisë.
Situata paraqitet kritike në Sicilia dhe në Kalabria, ku forcat zjarrfikëse thanë se kishin kryer më shumë se 500 operacione në 12 orët e fundit, duke përdorur pesë avionë në përpjekje për të shuar flakët nga lart. Ndërkohë, pas përfundimit të operacioneve në Greqi, tre avionë janë nisur në Itali përmes Mekanizmit Evropian të Mbrojtjes Civile, pas kërkesës italiane për mbështetje për të luftuar zjarret në pyje.
Mediat lokale raportuan se pemët dhe toka po digjeshin në malet Madonie rreth 100 km nga kryeqyteti sicilian i Palermos dhe në qytetin e vogël të Linguaglossa, në shpatet e vullkanit Etna. Vatrat më problematike janë regjistruar në Reggino dhe, pikërisht, në zonat Bagaladi / Cardeto, Grotteria / Mammola / Martone, San Luca dhe Cittanova.
Dëme serioze janë raportuar në Kalabri, ku disa familje lanë shtëpitë e tyre dhe një burrë vdiq të mërkurën.
Temperaturat pritet të rriten në disa qytete italiane, përfshirë kryeqytetin, Romë, të premten, kur vala e të nxehtit mund të arrijë kulmin, sipas një buletini të ministrisë së shëndetësisë.
