Italia arriti objektivin e vaksinimit të plotë të 80% të popullsisë mbi moshën 12 vjeç kundër COVID-19, sipas të dhënave zyrtare. Sipas një uebfaqeje të qeverisë, 43,229,551 persona mbi 12 vjeç, nga një popullsi e përgjithshme prej rreth 60 milionësh, kishin përfunduar ciklin e tyre të vaksinimit që nga 10 tetori. Objektivi 80% u vendos nga komisioneri special për urgjencën COVID, gjenerali i ushtrisë Francesco Paolo Figliuolo, në mars.
“Ky është një nivel kritik mbi të cilin thonë ekspertët – dhe trendi që kemi regjistruar prej javësh e konfirmon këtë – se rreziku i shtrimit në spital është zvogëluar në mënyrë drastike”, tha zyra e komisionerit.
Guido Rasi, një ish drejtor në Agjencinë Evropiane të Barnave (EMA) dhe këshilltar aktual i Figliuolo, tha se nuk ishte vetëm një prag simbolik.
“Është një nivel që, llogaritjet tregojnë, lidhet me një reduktim të ndjeshëm të qarkullimit të virusit dhe një ulje drastike të shtrimeve në spitale”, tha ai.
Rasi shtoi se zvogëlimi i numrit të shtrimeve në spitale ishte thelbësor për rimëkëmbjen ekonomike të Italisë dhe për të ndihmuar sistemin kombëtar të kujdesit shëndetësor të rifokusohet në shërbimet që nuk lidhen me COVID. Sidoqoftë, arritja e objektivit prej 80% nuk është e mjaftueshme, sipas këshilltarit të komisionerit.
“Ne do të duhet të vazhdojmë të arrijmë pragjet e tjera: ose përqindje mbi 80% nëse vazhdojmë të përmbahemi nga vaksinimi i fëmijëve nën moshën 12 vjeç, ose 80% e të gjithë popullsisë, përfshirë 5 deri në 12 vjeç”, tha ai.
Shtrimet në spital për COVID në Itali janë në rënie të vazhdueshme që nga fillimi i verës. Italia ka regjistruar 131,274 vdekje të lidhura me COVID-19 që nga shpërthimi i pandemisë në shkurt të vitit të kaluar, numri i dytë më i lartë në Evropë pas Britanisë dhe i nënti më i lartë në botë. Vendi ka raportuar 4.7 milion raste deri më tani.
