Në provincën e Ragusës, karabinierët arrestuan një 28-vjeçar shqiptar të akuzuar për shpërndarje droge dhe përfshirje në një konflikt të dhunshëm. Operacioni për kapjen e tij u realizua me ndihmën e një helikopteri dhe njësive të qenve.
28-vjeçari akuzohet se mbrëmjen e 14 gushtit, së bashku me persona të tjerë, sulmoi dhe rrahu një burrë, duke i vjedhur celularin, çelësat e shtëpisë dhe portofolin. Pas incidentit, viktima përfundoi në spital dhe arriti ta identifikonte agresorin, çka çoi në nisjen e hetimeve nga karabinierët.
Gjatë kontrolleve, autoritetet gjetën një sasi të madhe marijuane, një peshore precize dhe një shumë parash. Gjatë këtij aksioni u arrestua edhe një prej vëllezërve të 28-vjeçarit. Aktualisht, i dyshuari ndodhet në paraburgim dhe po pret vendimin e gjykatës.
