Është zhvilluar ditën e sotme në GJKKO seanca e ish-kryetares së Bashkisë së Gjirokastrës, Zamira Rami. Ajo akuzohet për shpërdorim detyre, ndërsa GJKKO ka pranuar gjykimin e shkurtuar për të.
Mësohet se Rami akuzohet për prishjen e dy banesave në Gjirokastër të cilat ishin me leje të rregullt, duke shkaktuar një dëm prej 5 milionë lekësh të reja.
“SPAK e akuzon ish-kryetaren e Bashkisë Gjirokaster se në kundërshtim me ligjin, ka kryer veprime që kanë sjellë prishjen e dy pronave private gjatë realizimit të dy projekteve, një prej të cilave në kuadër të Rilindjes Urbane”, thuhet në njoftimin e SPAK.
Hetimi për Zamira Ramin ka nisur që më herët nga Prokuroria e Gjirokastrës. Këta të fundit shpallën moskompetencë, duke e kaluar dosjen në SPAK. Rami ka qenë ish-kryebashkiake nga radhët e LSI në Gjirokastër dhe është akuzuar nga disa banorë për shembjen e disa banesave në vitin 2019, me qëllimin për të zgjeruar një rrugë. Hetimi ka nisur në korrik të vitit 2019, kur dy qytetarë akuzuan Ramin se u kishte prishur garazhin e banesës që e kishin me leje dhe nuk u kishte dhënë asnjë dëmshpërblim. Rami akuzohet se ka shpërdoruar detyrën në projektin e zgjerimit të rrugës “Memoriali Kodra e Rilindasve” që lidh pjesën e poshtme të qytetit me sheshin “Çerçiz Topulli”
