Oligarkët janë një pjesë e rëndësishme e qeverisjes në vend prej kohësh dhe kjo është e vërtetuar nga fakti i thjeshtë se ata marrin prona publike dhe koncesione të majme. Tashmë ata bëjnë thirrje hapur edhe për votën. Gjergj Luca, biznesmeni që u konfliktua me Luçiano Boçin në Elbasan ka bërë thirrje që në 25 prill qytetarët të votojnë për të, për Samir Manen dhe Shefqet Kastratin. Luca thotë se këta do e bëjnë Shqipërinë dhe ironia është e qartë pas fjalëve se kushdo që të zgjidhet, do ketë me vete edhe oligarkët.
“Ju duhet të çoheni në datën 25 për të ecur përpara dhe për të votuar partinë e punës dhe të vërtetës dhe jo për horrat që kanë dalë rrugëve e për të vjellë vrer. Për çfarë e bëjnë se një bark ka njeriu, një gojë ka njeriu, një metër varr do marrë në fund njeriu. Edhe ju që punoni aty në zjarr dhe unë në det po na marrin nëpër gojë ata filozofë që rrinë nëpër studio televizive për të helmuar këtë vend e këtë popull. Nesër, shkoni votoni për Gjergj Lucën, shkoni votoni për Çet Kastratin, shkoni votoni për Zamir Manen. Shkoni votoni për ne, se ne e bëjmë Shqipërinë”, thotë Luca.
