Izraeli është përfshirë nga një tjetër valë sulmesh me raketë të lëshuara nga Irani në orët e para të mëngjesit të së martës.
Sirenat e alarmit kanë rënë në disa zona të vendit, përfshirë Tel Avivin, Herzliyan dhe Jerusalemin, ndërsa autoritetet ushtarake u kanë bërë thirrje qytetarëve të kërkojnë menjëherë strehim të sigurt.
Forcat e Mbrojtjes së Izraelit konfirmuan se mbrojtja ajrore është vënë në funksion për të neutralizuar sulmet dhe se ekipet e emergjencës janë dislokuar në zonat e goditura.
Sipas dëshmitarëve për agjencinë Reuters, shpërthime të fuqishme janë regjistruar në Herzliya, në veri të Tel Avivit. Një autobus i parkuar është goditur dhe përfshirë nga flakët.
Ndërkohë, një video e shpërndarë në rrjetet sociale tregon mbetjet e një predhe të rrëzuar në një zonë banimi në qarkun qendror të Izraelit.
Sipas një burimi të CNN, një raketë është parë duke fluturuar mbi Jerusalem. Alarmet janë aktivizuar në disa qytete, ndërsa ushtria ka njoftuar se banorët mund të largohen nga strehimoret pas kalimit të rrezikut të menjëhershëm.
Në zhvillimet paralele, ushtria izraelite ka deklaruar se ka eliminuar Ali Shadmanin, sipas tyre, komandanti aktual i Shtabit të Përgjithshëm të Forcave të Armatosura të Iranit.
Shadmani ishte emëruar në këtë post pas vrasjes së Gholamali Rashid një javë më parë, gjithashtu nga një sulm izraelit.
