Erion Alibej ka dhënë një dëshmi të fortë para Gjykatës së Posaçme, ku ka rrëfyer rolin e tij në trafikun ndërkombëtar të kokainës, ndërsa ka mohuar përfshirjen në veprat e rënda kriminale që lidhen me vrasje.
Në rrëfimin e tij, Alibej tha se në bashkëpunim me vëllain Endrit Alibej dhe një shtetas turk – të cilin e përshkroi si mik të familjes, kishin organizuar një ngarkesë prej 530 kilogramësh kokainë, me destinacion Turqinë, përmes portit të Mersinit.
Sipas tij, gjithçka ishte planifikuar përmes komunikimeve në aplikacionin e enkriptuar Sky ECC, një platformë e përdorur gjerësisht nga grupet kriminale.
“Ne ishim biznesmenë që operonim në aktivitete të paligjshme, por nuk kemi pasur lidhje me vrasje. E gjithë pasuria ishte investuar në atë ngarkesë,” deklaroi ai para trupës gjykuese.
Por plani mori një kthesë dramatike. Sipas Alibejt, dy figurat kyçe të trafikut, vëllai i tij Endriti dhe shtetasi turk, u vranë.
Humbja e tyre, sipas tij, solli jo vetëm pasoja emocionale, por edhe një falimentim të plotë ekonomik: “Kam arritur të mbetem pa të ardhura, deri në pikën që nuk siguroja dot as bukën e gojës.”
Alibej përmendi në mënyrë të drejtpërdrejtë edhe emrin e Suel Çelës, për të cilin tha se “kishte interes që Endriti të zhdukej nga skena”.
Ai akuzoi ashpër edhe institucionet ligjzbatuese në Elbasan, duke lëshuar akuza të rënda për korrupsion: “Kam prova që në Prokurorinë dhe Policinë e Elbasanit ka funksionarë të korruptuar.”
Dëshmia e tij vjen në kuadër të hetimeve për dosjen “Plumbi i Artë”, që ka përfshirë një rrjet të gjerë të trafikut ndërkombëtar të drogës, por edhe lidhje të dyshuara me krime të rënda dhe influencë në struktura shtetërore.
