Mazhoranca ka rrëzuar në Konferencën e Kryetarëve kërkesën e opozitës për të ngritur një Komision Hetimor për Parandalimin e Konfliktit të Interesit për Abuzimet me Fondet Publike. Mesa duket, bashkëshorti i Olta Xhaçkës, “investitori strategjik” ka shtyrë Partinë Socialiste të mos e votojë këtë Komision. Kujtojmë se bashkëshorti i ish-ministres së Jashtme, Artan Gaçi, akuzohet se ka përfituar statusin “investitor strategjik” në kohën kur Olta Xhaçka ka qenë në postin e ministres, në konflikt të hapur interesi.
Por jo vetëm kaq, pasi pak ditë më parë kryebashkiaku i zgjedhur i Himarës, Fredi Beleri ka depozituar një padi ku thuhet se Artan Gaçi ka përfituar në mënyrë të paligjshme edhe tokën 5500 metër katrorë, të cilën e përdori për të përfituar statusin. Dosja për Oplta Xhaçkën dhe bashkëshortin e saj po hetohet nga SPAK.
Ndërkohë, Kuvendi vijon të mbajë peng zbatimin e vendimit të Gjykatës Kushtetuese për mandatin e deputetes dhe ish-ministres Olta Xhaçka.
Në fund të muajit janar, Gjykata Kushtetuese shfuqizoi si antikushtetues dy vendime të Kuvendit për të bllokuar dërgimin në këtë gjykatë të mandatit të deputetes Olta Xhaçka, por 8 muaj më pas këto vendime nuk janë zbatuar ende nga Kuvendi.
