Kryetari i Partisë Demokratike Sali Berisha gjatë konferencës së sotme për mediat i është përgjigjur akuzave që bëri dje deputeti Gazment Bardhi duke i quajtur ato trillime. Bardhi dje tha se ish-kryeministri kishte urdhëruar demokratët që mos të firmosnin për ngritjen e komisionit Hetimor për Investimet Strategjike. Kërkesa për ngritjen e këtij komisioni u rrëzua dje në Kuvend. Bardhi pati dhe një zënkë me Flamur Nokën.
‘ Sqaro demokratët pse u bashkuat me PS-në për të bllokuar komisionin për investimet strategjike. Pse i nis Berisha mesazh deputetëve që të bëhen bashkë për të bllokuar komisionin. Sa për elektoratin unë nuk kam ardhur ndonjëherë në zyrën tënde, ti ke ardhur në 2020 dhe më ke thënë mos më ço në Kukës se më djeg anëtarësia e Partisë.’- tha Bardhi
Ndërkohë Berisha i përgjigj ashpër Bardhit
“Të besosh trillimet e Gazment Bashës është sikur të besosh Lulzim Bashën. Njësoj! Nuk bllokojmë ne, por mund t’ju them se Ali Basha dhe Gaz Basha po i shërbejnë me besnikëri të neveritshme Ramës. Mbajeni mend këtë që ju them. S’do jetë e largët dita kur të kuptohet qëllimi i këtyre”, tha Berisha.
Mirëpo, përpos “sherreve” brenda të njejtit loj, kryetari i Grupit Parlamentar të PS-së, Taulant Balla akuzoi opozitën se ka pasur përpjekje për falsifikim firmash.
‘S’doja ta zhvilloja këtë debat me ju. S’ka ndodhur në Kuvend që të marrësh firma nga një kërkesë të rrëzuar dhe me të njëjtat firma të sjellësh një kërkesë të re. Kjo është përpjekje për falsifikim. Firma është një shprehje vullneti që shprehet një herë. Nuk mund ta marrësh firmën e një firmëtari dhe ta transferosh në dokumentin tjetër”, tha Balla.
Deputeti Gazment Bardhi iu përgjigj Ballës pse u rrëzua komisioni për Investimet Strategjike.
“Një deputet i këtij Kuvendi që është një nga ministrat më të rëndësishëm të këtij Kuvendi, rrezikon mandatin dhe së dyti të shkojë në burg”, iu përgjigj Bardhi
Deputetët e PD akuzuan se megjithëse qëllimi i ligjit për investitorët strategjik ishte pozitiv, ai u përdor për t’u dhënë favore njerëzve me lidhje të forta pranë qeverisë dhe drejtuesve të Partisë Socialiste. Në kërkesën e re të depozituar nga PD më 27 maj, u shtuan firmat e Lulzim Bashës dhe Enkelejd Alibeajt.
Pas debateve Kuvendi miratoi përbërjen e Komisioneve për Reformën zgjedhore dhe atë territoriale.
Nga ana tjetër Gentiana Sula u konfirmua në krye të autoritetit për Informimin mbi dokumentet e ish-Sigurimit të Shtetit për një mandat tjetër.
